IHIGANWA PRIMUS LIGUE MU MPERA Z’IGICE CAMBERE CA 2014-2015
Urukino rusozera ihiganwa rikuru ry’umupira w’amaguru mu Burundi ntirworoheye umugwi VITAL’O usanzwe uramutswa ikibanza cambere.
Umugwi BUJUMBURA CITY, naho wari umaze igihe utavyifatamwo neza, wahavuye wivyukiraniriza ku mugwi wambere mu kuwutsinda 0-1, igitsindo catsinzwe na NDAYISENGA Kevin (Dambo) yaheruka gusezererwa na Vital’o, ku munota udashika uwa 4 w’urukino.
Urukino rwari rubereye ijisho kubera ubuhinga bwibonekeje ku mpande zose, mbere hakaba habaye uguhusha ibitsindo bitari bike.
Ukwo gutsindwa kwa Vital’o kwaciye kugarurira umwizero imigwi isanzwe iyikurikira ku rutonde rw’imfatakibanza, aho bikibonekeza ko amanota yahora atandukanya umugwi wambere n’uwakabiri yavuye kuri 6 akagaruka kuba 3 gusa, mukaba mwomenya ko iyindi migwi yose isanzwe iza mu bibanza 4 vyambere yashoboye kwitahukanira intsinzi.
Mu nkino zari zitezwe cane twovuga nka LLB S4A yatsinze VOLONTAIRE 3-1, muri ivyo 3, bibiri bikaba vyinjijwe n’umusatirizi akomeye CLAUDE NDARUSANZE batazira LAMBA-LAMBA inyuma yo kumara indwi zitari nke atabona igoli.
ATHLETICO na yo ikaba yatsinze bigoranye umugwi ucifashe nabi gushika ubu ari wo Academy Tchité 1-0, kikaba cabonetse ku mwiheburo udasanzwe mu gice kigira kabiri c’urukino.
Muri make rero, ico kuzirikana ni uko umugwi VITAL’O uhejeje igice cambere uri kw’isonga, mu nkino 15 ukaba watsinzwe gatatu, unganya rimwe utsinda inkino 11 zose.
Umugwi uhereza na wo ukaba wakoze ikitari bwaboneke mw’ihiganwa ry’Uburundi aho umugwi uheza igice caryo utigeze uronka inota na rimwe ahubwo ukaba uremerewe n’umwenda w’ibitsindo bishika 50!
Mu zindi nkino zabaye twovuga:
*Olympic Star 2-1 Royal FC,
*Inter Star 1-0 Prince Louis,
*Messager Buja 0-0 Nyanza Utd
*Rusizi FC 0-0 Flambeau’Est
*Athletico Olympic 1-0 Ac.Tchité
*Muzinga 1-1 Messager Ngozi
*LLB S4A 3-1 Volontaire
*Vital’o 0-1 Bujumbura City
Abasore ba Bujumbura City, umugwi ufashwa n’uburongozi bw’igisagara ca Bujumbura bari bashajije nk’abipfuza intsinzi
